ᠪᠤᠷᠤᠯᠵᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/1/23
      ᠲᠤᠯᠮ᠎ᠠ ᠶᠢ ᠶᠠᠭᠠᠷᠠᠵᠤ ᠰᠠᠨᠳᠤᠴᠢᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠢᠷᠡᠳᠡᠯ᠎ᠡ ᠭᠠᠯ ᠬᠦᠰ ᠴᠤ ᠦᠭᠡᠢ ᠭᠡᠷ ᠨᠢ ᠵᠢᠪᠡᠬᠡᠢ ᠳᠠᠭᠠᠭᠠᠵᠤ ᠦᠬᠢᠨ ᠨᠢ ᠡᠴᠢᠬᠡ ᠶᠢᠨ ᠢᠶᠠᠨ ᠤᠷᠤᠨ ᠲᠡᠭᠡᠷ᠎ᠡ ᠦᠪᠡᠷ ᠤᠨ ᠢᠶᠠᠨ ᠲᠡᠪᠡᠯ ᠢ ᠦᠷᠦᠭᠡᠯᠳᠦᠨ ᠨᠦᠮᠦᠷᠦᠭᠡᠳ ᠬᠠᠴᠢᠨ ᠶᠡᠬᠡᠪᠡᠷ ᠬᠠᠯᠠᠭᠤᠷᠠᠨ ᠲᠠᠭᠵᠢᠨ ᠴᠡᠴᠡᠷᠡᠵᠦ ᠬᠡᠪᠳᠡᠵᠤ ᠪᠠᠶᠢᠯ᠎ᠠ᠃ ᠲᠤᠯᠮ᠎ᠠ᠄    — ᠪᠤᠷᠬᠠᠨ ᠮᠢᠨᠢ︕ ᠦᠬᠢᠨ ᠮᠢᠨᠢ ᠡᠪᠡᠳᠴᠢᠬᠡ ᠤᠤ︖ ᠶᠠᠭᠠᠬᠢᠨ᠎ᠠ︖ ᠭᠡᠵᠦ ᠣᠣᠯᠭ᠎ᠠ ᠠᠯᠳᠠᠵᠤ ᠲᠡᠪᠡᠷᠢᠨ ᠠᠪᠳᠠᠯ᠎ᠠ ᠦᠷᠦᠭᠡᠯᠳᠦᠵᠦ ᠬᠤᠴᠢᠭᠰᠠᠨ ᠲᠡᠪᠡᠯ ᠠᠴᠠ ᠨᠢ ᠮᠤᠵᠢᠭᠤᠷᠬᠠᠨ ᠬᠦᠯ ᠨᠢ ᠪᠤᠯᠳᠠᠰᠬᠢᠨ ᠢᠯᠡ ᠭᠠᠷᠤᠯ᠎ᠠ᠃     — ᠬᠦᠶ᠋ᠢ᠂ ᠮᠢᠨᠦ ᠦᠬᠢᠨ ᠲᠤᠮᠤᠬᠠᠨ ᠲᠡᠪᠡᠯ ᠶᠤᠮ ᠤᠤ᠂ ᠬᠦᠨᠵᠢᠯᠡ ᠪᠠᠨ ᠨᠦᠮᠦᠷᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠤᠢ︖ ᠦᠬᠢᠨ ᠬᠠᠷᠢᠭᠤ ᠳᠤᠨᠢ ᠨᠢᠬᠡ ᠶᠡᠭᠡ ᠲᠤᠮᠤ ᠬᠠᠷᠠᠭᠰᠠᠨ ᠢᠶᠠᠨ ᠦᠯᠦ ᠶᠠᠯᠢᠭ ᠦᠯᠦᠩ ᠭᠬᠢᠷ ᠰᠠᠭᠤᠭᠰᠠᠨ ᠪᠠᠯᠴᠠᠭᠠᠷ ᠬᠤᠶᠠᠷ ᠬᠦᠯ ᠢᠶᠠᠷ ᠢᠶᠠᠨ ᠲᠡᠪᠡᠯ ᠤᠨ ᠢᠶᠠᠨ ᠬᠤᠷᠮᠤᠢ ᠶᠢ ᠰᠤᠷᠤᠮᠠᠭ ᠭᠡᠭᠴᠢ ᠨᠢ ᠲᠤᠯᠤᠮᠳᠠᠨ ᠨᠤᠭᠳᠤᠰᠬᠢᠨ ᠲᠡᠪᠡᠯ ᠳᠡᠭᠡᠨ ᠬᠠᠷᠢᠯ᠎ᠠ᠃ ᠲᠤᠯᠮ᠎ᠠ ᠳᠤ ᠬᠡᠯᠡᠬᠦ ᠦᠬᠡ ᠴᠤ ᠤᠯᠳᠠᠭᠰᠠᠨ ᠦᠭᠡᠢ᠃ ᠱᠠᠯᠠᠪᠬᠠᠨ ᠪᠤᠰᠴᠤ ᠵᠤᠤᠬᠠᠨ ᠤ ᠪᠠᠨ ᠡᠮᠦᠨ᠎ᠡ ᠰᠦᠬᠦᠷᠡᠨ ᠰᠠᠭᠤᠭᠠᠳ ᠨᠢᠳᠦᠨ ᠠᠴᠠ ᠪᠠᠨ ᠦᠪᠡᠷ ᠤᠨ ᠡᠷᠬᠡ ᠦᠭᠡᠢ ᠤᠷᠤᠰᠬᠤ ᠨᠢᠯᠪᠤᠰᠤ ᠪᠠᠨ ᠭᠠᠷ ᠢᠶᠠᠷ ᠢᠶᠠᠨ ᠱᠤᠳᠤᠷᠤᠭᠠᠳ ᠭᠠᠯ ᠢᠶᠠᠨ ᠠᠰᠠᠭᠠᠯ᠎ᠠ᠃ ᠦᠬᠢᠨ ᠨᠢ ᠴᠡᠭᠡᠵᠢ ᠪᠠᠨ ᠲᠦᠩᠬᠡᠯᠵᠡᠬᠦᠯᠦᠨ ᠵᠤᠪᠠᠭᠤᠷᠢ ᠲᠠᠢ ᠪᠠᠷ ᠤᠶᠢᠷ᠎ᠠ ᠤᠶᠢᠷᠠᠬᠠᠨ ᠠᠮᠢᠰᠬᠤᠯᠯᠠᠵᠤ ᠲᠡᠪᠡᠯ ᠤᠨ ᠢᠶᠠᠨ ᠲᠤᠤᠭᠤᠷ ᠨᠢᠳᠦ ᠪᠠᠨ ᠬᠢᠯᠠᠯᠵᠠᠭᠤᠯᠤᠨ ᠡᠬᠡ ᠶᠢ ᠪᠠᠨ ᠲᠠᠭᠠᠭᠤᠯᠤᠨ ᠬᠠᠷᠠᠭᠰᠠᠭᠠᠷ᠃ ᠦᠬᠢᠨ ᠬᠠᠯᠠᠭᠤᠨ ᠤ ᠰᠢᠯ ᠬᠠᠭᠠᠷᠠᠮ᠎ᠠ ᠬᠠᠯᠠᠭᠤᠷᠠᠵᠠᠢ᠃ ᠡᠮ ᠦᠭᠬᠦᠭᠡᠳ ᠴᠤ ᠪᠠᠭᠤᠷᠠᠳᠠᠭ ᠦᠭᠡᠢ᠃ ᠡᠮᠴᠢ ᠲᠠᠭᠤᠳᠠᠮᠠᠷ ᠪᠠᠶᠢᠳᠠᠭ᠃ ᠶᠠᠳᠠᠵᠤ ᠬᠦᠮᠦᠨ ᠤᠷᠤᠵᠤ ᠢᠷᠡᠬᠦ ᠦᠭᠡᠢ ᠶᠤᠮ᠃ ᠲᠤᠯᠮ᠎ᠠ ᠦᠪᠡᠷ ᠤᠨ ᠢᠶᠠᠨ ᠪᠤᠳᠤᠯ ᠠᠴᠠ ᠠᠶᠤᠯ᠎ᠠ᠃ ᠪᠢ ᠬᠠᠨᠢ ᠮᠦᠷᠦᠭᠡᠰᠦᠯ᠎ᠡ ᠭᠡᠵᠢ ᠤᠤ︖ ᠦᠭᠡᠢ ᠦᠭᠡᠢ ᠦᠬᠢᠨ ᠮᠢᠨᠢ ᠯᠡ ᠪᠠᠶᠢᠬᠤ ᠳᠤ ᠪᠤᠯᠤᠯ᠎ᠠ᠃ ᠬᠠᠷᠢᠨ ᠬᠠᠯᠠᠭᠤᠨ ᠢ ᠨᠢ ᠶᠠᠭᠠᠬᠢᠵᠤ ᠪᠠᠭᠤᠯᠭᠠᠬᠤ ᠪᠤᠢ︖ ᠡᠬᠡ ᠲᠠᠢ ᠬᠦᠮᠦᠨ ᠦᠬᠦᠳᠡᠭ ᠦᠭᠡᠢ ᠭᠡᠳᠡᠭ᠃ ᠤᠰᠤ ᠪᠠᠨ ᠦᠭᠬᠦᠶ᠎ᠡ ᠪᠠᠶᠢᠵᠠ︕    — ᠮᠢᠨᠦ ᠦᠬᠢᠨ ᠷᠠᠰᠢᠶᠠᠨ ᠬᠦᠷᠳᠡᠬᠦ ᠤᠤ︖ ᠦᠬᠢᠨ ᠤᠮᠤᠭᠤᠯᠳᠠᠵᠤ ᠬᠠᠳᠠᠭᠰᠠᠨ ᠤᠷᠤᠭᠤᠯ ᠢᠶᠠᠨ ᠰᠢᠯᠡᠮᠳᠡᠵᠦ ᠦᠨᠳᠡᠶᠢᠭᠡᠳ ᠡᠬᠡ ᠶᠢᠨ ᠢᠶᠠᠨ ᠤᠰᠤ ᠶᠢ ᠨᠢᠭᠡ ᠠᠮᠢᠰᠬᠤᠭ᠎ᠠ ᠪᠠᠷ ᠵᠠᠯᠬᠢᠯᠠᠴᠢᠬᠠᠯ᠎ᠠ᠃ ᠡ ᠠᠰᠢᠬᠦᠢ᠂ ᠦᠬᠢᠨ ᠨᠦᠢᠷᠰᠤᠯ᠎ᠠ᠃ ᠭᠡᠪᠡᠴᠦ ᠪᠠᠶᠢᠨ ᠪᠠᠶᠢᠨ ᠦᠨᠡᠭᠡᠴᠢᠯᠡᠨ᠎ᠡ᠃ ᠳᠠᠪ ᠲᠤᠪ ᠬᠢᠨ ᠴᠤᠴᠢᠨ ᠰᠡᠷᠡᠨ᠎ᠡ᠃ ᠲᠤᠯᠮ᠎ᠠ ᠠᠷᠭ᠎ᠠ ᠶᠠᠳᠠᠬᠤ ᠳᠠᠭᠠᠨ ᠦᠬᠢᠨ ᠢᠶᠠᠨ ᠪᠤᠷᠤᠯᠵᠢᠯᠠᠯ᠎ᠠ᠃ ᠰᠠᠨᠠᠭ᠎ᠠ ᠲᠠᠭᠠᠭᠠᠳ ᠴᠤ ᠲᠡᠷᠡ ᠶᠤᠮ ᠤᠤ︖ ᠦᠬᠢᠨ ᠨᠢ ᠠᠶᠢᠪᠠᠩ ᠲᠠᠶᠢᠪᠤᠩ ᠰᠠᠶᠢᠬᠠᠨ ᠨᠦᠢᠷᠰᠤᠯ᠎ᠠ᠃ ᠮᠠᠷᠭᠠᠰᠢ ᠦᠷᠯᠦᠭᠡ ᠦᠬᠢᠨ ᠡᠪ ᠡᠷᠡᠬᠦᠯ ᠴᠤᠪᠤᠭᠤ ᠴᠤᠯᠬᠢᠨ ᠰᠡᠷᠡᠯ᠎ᠡ᠃ ᠲᠡᠪᠬᠡᠷᠴᠡᠵᠤ ᠴᠤᠪᠬᠤᠷᠴᠡᠵᠤ ᠢᠨᠢᠶᠡᠵᠦ ᠬᠠᠨᠢᠶᠠᠵᠤ ᠶᠠᠪᠤᠭᠠᠳ ᠲᠤᠯᠢᠨ ᠳᠤ ᠭᠡᠨᠡᠳᠳᠡ ᠦᠪᠡᠷ ᠢ ᠪᠠᠨ ᠬᠠᠷᠠᠭᠰᠠᠨ ᠢᠶᠠᠨ᠄     — ᠬᠦᠶ᠋ᠢ᠂ ᠡᠵᠢ ᠡ︖ ᠮᠢᠨᠦ ᠬᠠᠮᠠᠷ ᠶᠠᠭᠠᠬᠢᠭᠠᠳ ᠬᠦ᠋ ᠲᠠᠢ ᠪᠤᠯᠴᠢᠬᠠᠭᠰᠠᠨ ᠶᠤᠮ ᠪᠤᠯ︖     — ᠡᠵᠢ ᠨᠢ ᠬᠦᠭᠡᠳᠡᠭᠰᠡᠨ ᠶᠤᠮ ᠡ᠂ ᠮᠢᠨᠦ ᠦᠬᠢᠨ ᠪᠦᠷ ᠬᠤᠯᠠ᠂ ᠢᠷᠡᠬᠦ ᠦᠭᠡᠢ ᠶᠠᠪᠤᠴᠢᠬᠠᠬᠤ ᠭᠡᠳ ᠪᠠᠶᠢᠭᠰᠠᠨ᠃     — ᠠ᠂ ᠬᠦᠭᠡᠳᠡᠪᠡᠯ ᠬᠤᠯᠠ ᠶᠠᠪᠤᠳᠠᠭ ᠦᠭᠡᠢ ᠶᠤᠮ ᠤᠤ︖     — ᠲᠡᠶᠢᠮᠦ ᠡ᠃     — ᠬᠤᠷᠳᠤᠨ ᠢᠷᠡᠳᠡᠭ ᠶᠤᠮ ᠤᠤ︖     — ᠲᠡᠶᠢᠮᠦ ᠡ᠃ ᠲᠤᠯᠮ᠎ᠠ ᠡᠷᠳᠡᠴᠢ ᠪᠤᠯᠵᠤᠮᠤᠷ ᠮᠡᠲᠦ ᠱᠤᠯᠤᠭᠠᠨᠠᠨ ᠵᠢᠷᠬᠢᠬᠦ ᠦᠬᠢᠨ ᠤ ᠪᠠᠨ ᠳᠠᠭᠤᠨ ᠳᠤ ᠪᠦᠪᠠᠶᠢᠯᠡᠭᠳᠡᠨ ᠲᠤᠭᠬᠢᠵᠡᠢ᠃ ᠠᠳᠠ ᠲᠠᠢ ᠪᠠᠷ ᠴᠢᠰ ᠴᠢᠰ ᠢᠨᠢᠶᠡᠬᠦ ᠴᠢᠮᠡᠭᠡ ᠪᠠᠷ ᠰᠡᠷᠡᠭᠡᠳ ᠭᠠᠭᠴᠠᠬᠠᠨ ᠰᠦᠨᠢ ᠶᠢᠨ ᠨᠦᠢᠷ ᠲᠠᠭᠠᠯᠬᠦᠢ ᠤᠨᠳᠠᠭᠰᠠᠨ ᠦᠪᠡᠷ ᠢ ᠪᠠᠨ ᠵᠢᠮᠡᠯᠡᠵᠦ᠂ ᠦᠬᠢᠨ ᠢ ᠪᠠᠨ ᠡᠩᠬᠦᠷᠡᠶᠢᠯᠡᠨ ᠦᠨᠦᠰᠦᠭᠡᠳ᠂ ᠲᠠᠭᠠᠷᠠᠵᠤ ᠬᠦᠭᠡᠷᠡᠭᠡᠳ ᠭᠠᠳᠠᠭᠤᠷ ᠲᠡᠨᠦᠬᠦ ᠦᠭᠡᠢ ᠪᠠᠶᠢᠬᠤ ᠶᠢ ᠬᠢᠴᠢᠶᠡᠩᠬᠦ᠋ᠢᠯᠡᠨ ᠵᠠᠬᠢᠭᠠᠳ ᠠᠵᠢᠯ ᠳᠠᠭᠠᠨ ᠶᠠᠪᠤᠬᠤ ᠪᠠᠷ ᠦᠨᠳᠡᠶᠢᠯ᠎ᠡ᠃     ᠦᠬᠢᠨ ᠡᠳᠦᠷ ᠪᠦᠬᠦᠨ ᠬᠡᠯᠡᠵᠦ ᠬᠤᠴᠤᠷᠳᠠᠭ ︽ᠬᠤᠷᠳᠤᠨ ᠢᠷᠡᠭᠡᠷᠡᠢ︾ ᠭᠡᠳᠡᠭ ᠦᠭᠡ ᠪᠠᠨ ᠬᠡᠯᠡᠭᠡ ᠦᠭᠡᠢ ᠦᠨᠵᠢᠭᠰᠡᠨ ᠢ ᠠᠵᠢᠯ ᠳᠠᠭᠠᠨ ᠶᠠᠭᠠᠷᠠᠭᠰᠠᠨ ᠲᠤᠯᠮ᠎ᠠ ᠤᠭᠳᠤ ᠠᠩᠵᠠᠭᠠᠷᠠᠬᠰᠠᠨ ᠦᠭᠡᠢ᠃ ᠶᠠᠪᠤᠭᠤᠳᠠ ᠲᠤᠮᠳᠠ ᠪᠠᠨ ᠪᠤᠳᠤᠭ ᠰᠢᠩᠬᠤ ᠪᠠᠨ ᠰᠡᠷᠬᠦᠭᠡᠬᠦ ᠪᠠᠷ ᠲᠤᠯᠢ ᠪᠠᠨ ᠭᠠᠷᠭᠠᠨ ᠬᠠᠷᠠᠳᠠᠯ᠎ᠠ ᠦᠭᠡᠳᠡ ᠠᠴᠠ ᠨᠢ ᠲᠦᠷᠯᠡᠬᠡᠷ ᠠᠯᠠᠭ ᠨᠢᠳᠦ ᠲᠠᠢ ᠬᠠᠷ᠎ᠠ ᠬᠠᠯᠵᠠᠨ ᠪᠦᠰᠡᠭᠦᠢ ᠭᠠᠶᠢᠬᠠᠨ ᠬᠠᠷᠠᠵᠤ ᠪᠠᠶᠢᠯ᠎ᠠ᠃ ᠫᠦᠬᠦ ᠶᠠᠭᠠᠬᠢᠨ᠎ᠠ︕ ᠭᠡᠵᠦ ᠤᠤᠯᠭ᠎ᠠ ᠠᠯᠳᠠᠭᠠᠳ ᠠᠭᠤᠷᠯᠠᠵᠤ ᠢᠴᠢᠭᠰᠡᠨ ᠳᠡᠭᠡᠨ ᠮᠡᠨᠴᠡᠶᠢᠨ ᠤᠯᠠᠶᠢᠵᠤ ᠭᠡᠷ ᠲᠡᠭᠡᠨ ᠬᠠᠷᠠᠶᠢᠨ ᠤᠷᠤᠭᠠᠳ ᠬᠠᠰᠬᠢᠴᠠᠨ ᠵᠠᠩᠨᠠᠬᠤ ᠭᠡᠲᠡᠯ᠎ᠡ ᠦᠬᠢᠨ ᠨᠢ᠄     — ᠦᠨᠡᠨ ᠪᠠᠶᠢᠨ᠎ᠠ᠃ ᠡᠵᠢ ᠬᠤᠷᠳᠤᠨ ᠢᠷᠡᠯ᠎ᠡ ᠰᠢᠦ᠃ ᠤᠳᠤ ᠲᠡᠭᠡᠪᠡᠯ ᠠᠪᠤ ᠶᠢ ᠬᠡᠮᠡᠨ ᠪᠠᠶᠠᠷᠯᠠᠨ ᠬᠠᠰᠬᠢᠷᠤᠭᠠᠳ ᠪᠤᠷᠬᠠᠨ ᠪᠤᠯᠤᠭᠠᠴᠢ ᠡᠴᠢᠬᠡ ᠶᠢᠨ ᠢᠶᠠᠨ ᠵᠢᠷᠤᠭ ᠢ ᠶᠠᠭᠠᠬᠢᠬᠤ ᠡᠶᠢᠬᠦ ᠶᠢᠨ ᠵᠠᠭᠤᠷ᠎ᠠ ᠦᠭᠡᠢ ᠪᠤᠷᠤᠯᠵᠢᠭᠤᠯᠵᠤ ᠤᠷᠬᠢᠯ᠎ᠠ᠃                                 ᠵᠣᠬᠢᠶᠠᠭᠴᠢ᠄ ᠵᠠ᠊ · ᠰᠠᠷᠠᠨᠲᠤᠶᠠᠭ᠎ᠠ
ᠢᠷᠡᠯᠲᠡ᠄ ᠬᠥᠯᠦᠨ ᠪᠥᠢᠷ ᠮᠣᠩᠭᠤᠯ ᠰᠦᠯᠵᠢᠶ᠎ᠡ